Një zëdhënës i Komisionerit të Lartë të OKB-së për të Drejtat e Njeriut, Volker Türk, ka deklaruar se është “e qartë” se operacioni ushtarak i SHBA-ve për të kapur presidentin Nicolás Maduro dhe gruan e tij gjatë fundjavës “cenoi një parim themelor të së drejtës ndërkombëtare”.
Në një deklaratë, zëdhënësi tha se Türk është “thellësisht i shqetësuar” për situatën në Venezuelë, e cila ka shkaktuar frikë tek shumë qytetarë venezuelianë, ndërsa presidente në detyrë, Delcy Rodríguez, po vepron dukshëm nën ndikimin e Uashingtonit.
Ai gjithashtu përmendi se presidenti Trump ka premtuar të marrë nën kontroll industrinë e naftës së Venezuelës me ndihmën e kompanive më të mëdha amerikane të naftës.
Zëdhënësi i OKB-së sqaroi se “është e qartë që operacioni cenoi një parim themelor të së drejtës ndërkombëtare, sipas të cilit shtetet nuk duhet të kërcënojnë ose të përdorin forcë kundër integritetit territorial ose pavarësisë politike të ndonjë shteti”.
SHBA-të kanë justifikuar ndërhyrjen e tyre duke u bazuar në regjistrin e gjatë dhe të rëndë të shkeljeve të të drejtave të njeriut nga qeveria venezueliane, por zbatimi i përgjegjësisë për këto shkelje nuk mund të arrihet përmes një ndërhyrjeje ushtarake të njëanshme që shkel së drejtën ndërkombëtare.
Populli i Venezuelës meriton llogaridhënie përmes një procesi të drejtë, i cili duhet të fokusohet tek viktimat.
Sipas raportimeve të Zyrës së OKB-së për të Drejtat e Njeriut, situata në Venezuelë ka qenë e rënduar për gati një dekadë, me të drejtat e qytetarëve që janë shkelur vazhdimisht. Ka shqetësim se destabilizimi aktual dhe militarizimi i mëtejshëm i vendit si pasojë e ndërhyrjes së SHBA-ve vetëm do të përkeqësojnë situatën.
