Autoritetet zvicerane kanë pranuar dështime të rëndësishme në kontrollet e sigurisë pas zjarrit tragjik në barin “Le Constellation” në Crans-Montana, i cili shpërtheu gjatë festimeve të Vitit të Ri.
Ngjarja la të plagosur 116 persona, nga të cilët më shumë se dy të tretat vazhdojnë të trajtohen në spital. Sipas zyrtarëve, lokali nuk ishte inspektuar që prej vitit 2019.
Kryebashkiaku i Crans-Montana-s, Nicolas Feraud, kërkoi ndjesë publike në një konferencë për shtyp, duke pranuar se bashkia “nuk kishte asnjë sinjal” për moskryerjen e kontrolleve periodike.
Ai njoftoi gjithashtu ndalimin e menjëhershëm të përdorimit të fishekzjarreve brenda ambienteve të mbyllura, të cilat dyshohet se shkaktuan zjarrin.
“Inspektime periodike nuk u kryen midis viteve 2020 dhe 2025. Këshilli Bashkiak u vu në dijeni të kësaj situate pasi shqyrtoi dokumentet e paraqitura në zyrën e prokurorit publik fundjavën e kaluar. Na vjen shumë keq për këtë. Gjykata do të përcaktojë ndikimin e kësaj mbikëqyrjeje në zinxhirin e ngjarjeve që çuan në tragjedi. Ne do të marrim përgjegjësinë e plotë që përcaktojnë gjykatat”, tha Feraud.
Kryebashkiaku bëri të ditur se është mbyllur edhe një tjetër lokal i menaxhuar nga të njëjtët drejtues. Ai shtoi se raporti i zjarrit i vitit 2019 nuk evidentonte probleme sigurie, materiali izolues ishte konsideruar i pranueshëm dhe për shkak të madhësisë së ambientit nuk kërkohej instalimi i alarmit të zjarrit.
Megjithatë, sipas rregullave lokale, kontrollet e sigurisë në bare duhet të kryhen çdo vit.
“Ne kemi vendosur të ngarkojmë një firmë të specializuar të jashtme për të kryer inspektimin e 128 ndërtesave publike të bashkisë sa më shpejt të jetë e mundur. Si pjesë e këtij mandati, do të shqyrtojmë gjithashtu materialet ndërtimore dhe izoluese, edhe pse ligji nuk e kërkon këtë. Kjo është e nevojshme që inspektimi të arrijë objektivin e tij, rritjen e sigurisë,” tha Feraud.
Ndërkohë, policia zvicerane njoftoi se hetimet për shkaqet e zjarrit dhe për të çuar përpara drejtësisë përgjegjësit vijojnë.
