Foto: Qeveria e Malit të Zi / Vlada Crne Gore
Ministri i Administratës Publike, Marash Dukaj, pas një vizite dyditore në Bruksel, deklaroi se modernizimi i administratës publike është një nga elementet më të rëndësishme për përshpejtimin e reformave evropiane në Mal të Zi.
Ai theksoi se fokusi i takimeve ishte profesionalizimi i stafit, zhvillimi i infrastrukturës digjitale dhe forcimi i sigurisë kibernetike, fusha thelbësore për ecjen më të shpejtë drejt BE-së dhe përmbushjen e agjendës reformuese.
Dukaj tha se me partnerët evropianë ka diskutuar modele konkrete që mund të përmirësojnë menjëherë proceset e rekrutimit, shërbimet digjitale për qytetarët dhe menaxhimin e institucioneve.
Ai theksoi rëndësinë e zhvillimit të aftësive të nëpunësve dhe adoptimit të teknologjive moderne që do të krijojnë një administratë më efikase dhe të gatshme për anëtarësim në BE.
Gjatë vizitës, Dukaj u takua me drejtorin e përgjithshëm të DG NEAR, Gert Jan Koopman, si dhe me asistentin e sekretarit të përgjithshëm të NATO-s për inovacione dhe siguri kibernetike, Jean-Charles Ellermann-Kingombe.
Në takimet me NATO-n u konfirmuan rezultatet e mira të Malit të Zi në fushën e sigurisë kibernetike dhe u dakorduan hapa të rinj për forcimin e mëtejshëm të kapaciteteve.
Dukaj vlerësoi se vizita dëshmoi mbështetjen e fuqishme të partnerëve evropianë dhe të NATO-s për reformën në Mal të Zi, duke theksuar se progresi i arritur njihet dhe vlerësohet.
Ai shtoi se raporti i ardhshëm i Komisionit Evropian, i cili jep vlerësimet më të mira ndonjëherë për Ministrinë e Administratës Publike, duhet të shërbejë si nxitje për punë edhe më të vendosur drejt objektivit final: administratë moderne dhe rezultate të matshme në rrugën drejt BE-së.
