Anëtarësimi i Malit të Zi në NATO, i arritur në vitin 2017, është një nga vendimet më të rëndësishme në historinë e re të Malit të Zi dhe është sinjal i përkushtimit tonë të vendosur për ruajtjen e vlerave demokratike, paqes dhe prosperitetit ekonomik, deklaroi presidenti i Malit të Zi, Jakov Millatoviq.
“Sot, kur shënojmë përvjetorin e shtatë të anëtarësimit të Malit të Zi në NATO, theksoj rëndësinë e anëtarësimit tonë në këtë aleancë, veçanërisht në kohën e sfidave komplekse me të cilat përballet sot Evropa dhe bota. Ajo na siguron mbrojtje, parashikueshmëri dhe stabilitet, brenda së cilës ne mund të vazhdojmë pa pengesa të zhvillojmë demokracinë malazeze përmes forcimit të shtetit ligjor dhe ndërtimit të shoqërisë civile”, theksoi ai.
Sipas tij, angazhimi për anëtarësim duhet të tregohet në vazhdimësi përmes pjesëmarrjes vendimtare dhe aktive në misionet e NATO-s, duke kontribuar kështu në mbrojtjen kolektive dhe gatishmërinë e Aleancës për t’iu përgjigjur të gjitha sfidave të sigurisë.
Ai thotë se është detyrë e të gjitha institucioneve shtetërore, por edhe të gjithë vendimmarrësve, të kontribuojnë në përmirësimin e pozitës sonë ndërkombëtare dhe të vendit tonë si aleat i përgjegjshëm, kredibil dhe i besueshëm.
“Shqetësues është fakti që Mali i Zi ende nuk ka një ambasador në NATO, për të cilin kam insistuar disa muaj më parë gjatë konsultimeve për politikën e jashtme me përfaqësuesit e Qeverisë. Është e rëndësishme që të gjithë aktorët politikë t’i qasen vendimmarrjes me përgjegjësi dhe gjithëpërfshirëse, me qëllim duke forcuar rrënjësisht besueshmërinë e vendit tonë”, theksoi Millatoviq.
Siç tha ai, e konsideron si detyrim, por edhe “bazë të progresit në kuadër të procesit të negociatave me BE-në, duke e parë anëtarësimin e plotë si synimin final për të cilin ne përpiqemi”.
