Foto: Samir Adrović
Sot në Ulqin është mbajtur një protestë e madhe e qytetarëve lidhur me synimin e Qeverisë së kryeministrit Millojko Spajiq për t’ia dhënë me qira Plazhin e Madh për 99 vite një kompanie të mbështetur nga kapitali arab.
Ulqini sot ishte dashur të shënonte Ditën e Komunës me një seancë ceremoniale të Kuvendit të Komunës, të shtunën e parë të muajit prill, e cila simbolizon nisjen e marinarëve në anije, fillimin e sezonit dhe përfundimin e vjeljes së ullirit, por kryetari i Komunës së Ulqinit, Genci Nimanbegu, tha se nuk ka arsye për të festuar.
Në Ulqin janë anuluar të gjitha festat e planifikuara me rastin e Ditës së Komunës, përveç atyre që kanë të bëjnë me më të rinjtë.
Kryetari i Komunës së Ulqinit Genci Nimanbegu vlerësoi se Ulqini po përballet me sfidën më të madhe në histori.
“Dikush kërkon të na tjetërsojë pronën dhe t’ia japë një investitori për 90 vite. Ne nuk e lejojmë këtë,” tha Nimanbegu.
Ai tha se vendimi për të mbajtur një protestë në vend të shënimit të kesaj dite në mënyrë festive ishte i detyrueshëm sepse qyteti nuk ka qenë kurrë më i kërcënuar në histori.
“Dhe kjo është arsyeja pse ky tubim është vetëm një nga shembujt se si do të mbrojmë atë që na takon, atë që na lanë të parët tanë, atë që duhet t’ua lëmë brezave tanë. Ne do ta mbrojmë këtë qytet sado që do të na kushtojë”, tha Nimanbegu.
Ai ka përsëritur se kryeministri Spajiq po manipulon me konkluzionet e Kuvendi Komunal të Ulqinit.
“Ata miratuan një pjesë të konkluzioneve. Konkluzionet që thonë se nuk e pranojmë megaprojektin në komunën e Ulqinit, as që i kishin marrë parasysh. Ata nuk diskutuan as për konkluzionet që thonë se ne nuk pranojmë që toka jonë t’i jepet dikujt tjetër. Prandaj i bëj thirrje politikanëve në Podgoricë që më në fund të kuptojnë. Spajiqi arriti të kthejë kundër tij një qytet të tërë. Por mesazhi dërgohet nga këtu. Ulqini është unik. Ulqini sot nuk është vetëm. Të gjithë malazezët janë me ne. Kjo duhet të arrijë tek politikanët që duan të vendosin pa publikun ekspert, pa analiza, pa pasur të drejtë ne të vendosim”, tha Nimanbegu.
