Kuvendi i Shqipërisë ka miratuar sot dekretet e presidentit Bajram Begaj për ndryshimet e fundit në qeveri, pas propozimeve të kryeministrit Edi Rama.
Votimi u zhvillua mes tensioneve dhe debateve, pasi deputetët e opozitës bllokuan foltoren gjatë procesit.
Në kuadër të ndryshimeve, Albana Koçiu është emëruar zv/kryeministre, duke zëvendësuar Belinda Ballukun, e cila u shkarkua nga posti i ministres së Infrastrukturës dhe Energjisë.
Ferit Hoxha merr drejtimin e Ministrisë për Evropën dhe Punët e Jashtme, post i cili mbahej nga Elisa Spiropali.
Besfort Lamallari, më parë ministër i Drejtësisë, është emëruar ministër i Punëve të Brendshme, ndërsa në drejtimin e Drejtësisë emërohet Toni Gogu.
Erjona Ismaili merr postin e ministres për Marrëdhëniet me Parlamentin, ndërsa Enea Karakaçi do të udhëheqë Ministrinë e Infrastrukturës dhe Energjetikës.
Ermal Nufi zëvendëson Pirro Vengun si ministër i Mbrojtjes.
Kuvendi ka miratuar gjithashtu dekretet e shkarkimit për ministrat Belinda Balluku, Elisa Spiropali dhe Pirro Vengu.
Ministrat e rinj do të marrin zyrtarisht detyrën pas ceremonisë së betimit në Presidencë.
Seanca u karakterizua nga tensionet dhe debate të forta, pasi Partia Demokratike, opozita më e madhe, nuk mori pjesë në votim, duke kërkuar gjithashtu trajtimin e çështjes së Ballukut nga Prokuroria e Posaçme kundër Korrupsionit dhe Krimit të Organizuar (SPAK), lidhur me një kërkesë për arrestim, e cila ishte pezulluar nga gjykata. Balluku akuzohet për shkelje të barazisë në tenderë ose ankande publike.
