Pas festave, ne mund të presim një rritje të lehtë të numrit të personave të prekur me koronavirus, kryesisht për shkak të tubimeve dhe mosrespektimit të masave, tha epidemiologu i Institutit të Shëndetit Publik Dr. Nebojsha Sekulliq. Ai thotë se ditët e fundit kemi pasur një rënie të lehtë të numrit të pacientëve. “Është ende larg një situate që mund të na kënaqë. Ky është akoma një numër i qëndrueshëm, një përqindje e madhe e pozitiveve në lidhje me numrin e testuar. Pra, nuk mund të flasim për qetësim. Personalisht, unë nuk pres ndonjë rënie intensive në periudhën e ardhshme pas festave, duke ditur se çfarë po ndodh,” tha Sekulliq. Ai theksoi se përgatitjet për vaksinim kanë filluar që prej rreth një muaji. “Në javët e ardhshme, ne patjetër do të dimë se si do të shkojë e gjitha,” tha Sekulliq dhe përsëriti se vaksinimi nuk do të jetë i detyrueshëm.
