Rruga përpara në bisedimet për paqen në Ukrainë mbetet e paqartë, tha Donald Trump, pas atyre që ai i quajti bisedime “mjaftueshëm të mira” mes presidentit rus Vladimir Putin dhe të dërguarve amerikanë, të cilat megjithatë nuk sollën ndonjë përparim.
Pas takimit disaorësh në Kremlin të martën, i dërguari special i SHBA-së, Steve Witkoff, dhe dhëndri i Trump-it, Jared Kushner, pritet të takohen gjatë ditës në Florida me negociatorin kryesor ukrainas, Rustem Umerov.
Duke folur me gazetarët në Zyrën Ovale, Trump tha se Putini “do të dëshironte të arrinte një marrëveshje”, por se ai vetë “nuk mund të thotë se çfarë do të arrihet në përfundim, sepse duhen dy persona për të kër cyer tango”.
Presidenti shtoi se SHBA-ja, ndërkohë, kishte zgjidhur shumë prej problemeve me Ukrainën.
Kremlini tha të mërkurën se Putini kishte pranuar disa propozime të SHBA-së që synonin t’i jepnin fund luftës në Ukrainë dhe se ai ishte i përgatitur të vazhdonte punën për të gjetur një kompromis, por “kompromisi ende nuk është gjetur”.
Të dyja palët ranë dakord të mos zbulojnë përmbajtjen e diskutimeve të tyre në Kremlin, por të paktën një pengesë e madhe mbetet: fati i katër rajoneve ukrainase që Rusia i ka pushtuar pjesërisht.
Një zyrtar rus u tha gazetarëve se “deri më tani, nuk është gjetur kompromis” për çështjen e territorit, pa të cilin Kremlini nuk sheh “asnjë zgjidhje për krizën”.
Presidenti i Ukrainës, Volodymyr Zelenskyy, ka përjashtuar mundësinë e heqjes dorë nga territori i pushtuar nga Rusia dhe të mërkurën deklaroi se ekipi i tij po përgatitej për takime në Shtetet e Bashkuara, duke shtuar se dialogu me përfaqësuesit e Trump-it do të vazhdojë.
