Foto: Qeveria e Malit të Zi / Vlada Crne Gore
Zëvendëskryeministri dhe ministri i Jashtëm i Malit të Zi, Ervin Ibrahimoviq, mori pjesë në takimin e ministrave të jashtëm të NATO-s në Bruksel, ku u diskutua situata e sigurisë në hapësirën euroatlantike, me theks të veçantë te agresioni rus kundër Ukrainës.
Po ashtu u shqyrtua zbatimi i vendimeve të Samitit të NATO-s në Hagë, sidomos sa i përket rritjes së buxheteve për mbrojtje dhe përgatitjeve për Samitin e ardhshëm në Ankara.
Gjatë takimit u konfirmua uniteti i aleatëve dhe përkushtimi për forcimin e kapaciteteve të mbrojtjes dhe parandalimit, në mënyrë që Aleanca të reagojë me efikasitet ndaj të gjitha kërcënimeve të sigurisë.
Ministrat riafirmuan gjithashtu mbështetjen për Ukrainën, duke nënvizuar rëndësinë e një paqeje të drejtë dhe të qëndrueshme dhe rolin e SHBA-së në përpjekjet diplomatike.
Ibrahimoviq theksoi rëndësinë strategjike të Ballkanit Perëndimor për NATO-n dhe domosdoshmërinë që rajoni të mbetet në fokus të Aleancës, duke pasur parasysh sfidat e vazhdueshme të sigurisë dhe kërcënimet hibride.
Ai theksoi nevojën për një qasje proaktive dhe të koordinuar të NATO-s dhe BE-së ndaj rajonit.
Në mbyllje, ai deklaroi se Mali i Zi do të vazhdojë të japë kontribut aktiv në ruajtjen e paqes, stabilitetit rajonal dhe sigurisë së komunitetit euroatlantik.
