Foto: Shutterstock
Akciza specifike për cigaret do të rritet nga 1 janari, ndërsa ajo proporcionale do të mbetet e njëjtë.
Siç thuhet në njoftimin e Drejtorisë Doganore për Akciza, akciza specifike rritet nga 52 euro në 53,5 euro për mijë copë, ndërsa ajo proporcionale mbetet e njëjtë në 24,5 për qind të çmimit me pakicë të cigareve.
Në përputhje me nenin 36a, paragrafi 1 i Ligjit për akcizën, në rast të ndryshimit të masës së akcizës, në rastin konkret për cigaret, prodhuesit, importuesit si dhe të tjerët që kryejnë tregti me shumicë, dhe që produktin e caktuar të akcizës e kanë në magazinë një ditë para ndryshimit të shumës së akcizës, janë të obliguar që të bëjnë inventar dhe të llogarisin dhe paguajnë diferencën në akcizë sipas shumave dhe normave të përcaktuara me ligj.
“Në përputhje me përjashtimin e parashikuar në nenin 36a paragrafi 2 i ligjit, ata që kryejnë tregti me pakicë të produkteve të duhanit nuk janë të detyruar të bëjnë inventar stoku në rast të ndryshimit të masës së akcizës”, sqaroi Drejtoria Doganore.
Llogaritja e diferencës së akcizës dorëzohet në njësinë organizative kompetente të Drejtorisë Doganore përmes sistemit informativ për shkëmbimin elektronik të të dhënave të akcizës, në afat prej 15 ditësh pas përfundimit të muajit në të cilin ka ndryshuar shuma e akcizës, d.m.th. deri më 15 shkurt.
Drejtoria Doganore konstatoi se Ligji për akciza parasheh përgjegjësi për kundërvajtje dhe gjoba, nëse nuk bëhet inventarizimi, llogaritja dhe pagesa e akcizës.
