Shkencëtarët kanë paralajmëruar se një varg shpërthimesh vullkanike përgjatë “Unazës së paqëndrueshme të Zjarrit” në Paqësor mund të jetë shkaktuar nga një tërmet i madh.
Vullkani Krasheninikov në Kamchatka, Rusi, shpërtheu të dielën, dhe shpërthimi i tij u konsiderua historik. Kjo ishte hera e parë në më shumë se 600 vjet që vullkani lëshonte një re hiri 6 km lart në qiell.
Sipas ekspertëve, ky shpërthim shkatërrues ka të ngjarë të jetë shkaktuar nga tërmeti i madh me magnitudë 8.8, që goditi rajonin javën e kaluar.
Të mërkurën e kaluar, Rusia u godit nga i gjashti tërmeti më i madh i regjistruar ndonjëherë në botë, duke i detyruar njerëzit të largohen me shpejtësi nga shtëpitë, ndërsa paralajmërimet për cunami u lëshuan nga Kili deri në Hawaii.
Menjëherë pas tërmetit, një tjetër vullkan në rajonin e Kamchatkës shpërtheu gjithashtu, duke dërguar rrjedha lave poshtë shpateve të malit.
Sipas ekspertëve, ekziston një lidhje e drejtpërdrejtë mes tërmetit dhe shpërthimeve vullkanike.
Duket se tërmeti ka aktivizuar qendrat magmatike dhe ka pompuar energji shtesë në to. Vetëm disa orë më vonë, edhe Kluchevskaja Sopka, vullkani më i madh në gadishullin Kamchatka, shpërtheu me një rrjedhë lave dhe hiri.
Ndërsa të dielën, vullkani Krasheninikov u bë vullkani i dytë që shpërtheu papritur. Ekipi i Reagimit ndaj Shpërthimeve Vullkanike të Kamchatkës e quajti shpërthimin “historik” dhe raportoi se retë e hirit u përhapën për mbi 75 km nga vendi i shpërthimit.
Hera e fundit që Krasheninikov shpërtheu ishte diku midis viteve 1423 dhe 1503.
