Nëse kryetarët e komunave në Mal të Zi zgjidhen në zgjedhje, do të shmangen manipulimet e shumta, tha ministri i Administratës Publike Marash Dukaj.
“Ne jemi bazuar në strategjinë e reformës në administratën publike, kemi analizuar, pra kemi bërë një analizë gjithëpërfshirëse të sistemit të vetëqeverisjes lokale. Ajo analizë e tregoi qartë udhërrëfyesin fjalë për fjalë se ku do të shkojmë në pjesën që ka të bëjë me reformën e vetëqeverisjes lokale dhe këtë e kemi përcaktuar qartë në ligj, pra në draftin e ligjit të ri për vetëqeverisjen lokale,” sqaroi Dukaj në një deklaratë për Radion e Malit të Zi.
Dukaj theksoi se propozimi i këtij ligji është mesazh se ata janë të përgjegjshëm ndaj qytetarëve, praktik dhe duan të shmangin manipulimet.
“Ju vetë e dini se jemi dëshmitarë të inxhinierisë zgjedhore, ku disa votues kanë lëvizur nga qyteti në qytet dhe kanë ndërruar vendbanimin e tyre për të votuar. Qytetarët nuk kanë asnjë faj por sistemi fajëson partitë politike që i kanë keqpërdorur”, beson Dukaj.
Sipas tij, Ministria e Administratës Publike është udhëhequr nga praktikat nga rajoni, por edhe nga praktikat e Bashkimit Evropian.
“Organizimi i zgjedhjeve dhe sistemi i plotë do të përmirësohej shumë dhe do të kontribuonte në parimin e barazisë përmes kushteve të barabarta për të gjithë pjesëmarrësit në procesin zgjedhor, pjesëmarrjes më të madhe, racionalizimit të kostove, efikasitetit të sistemit të vetëqeverisjes lokale dhe transparencës,“ ka shpjeguar ministri.
Dukaj vlerëson se zgjedhja aktuale e kryetarit të komunës nuk përputhet me standardet demokratike.
Prandaj ai thotë se është shumë e rëndësishme që propozimi i tij për modelin e zgjedhjes së kryetarëve të komunave të zbatohet edhe në vendin tonë.
“Kjo do të kontribuonte në një shkallë më të madhe të përgjegjësisë ndaj qytetarëve, pjesëmarrje më të madhe në procesin zgjedhor, besim më të madh, të gjitha këto kontribuojnë në forcimin e proceseve demokratike në nivel lokal”, përfundoi ministri Dukaj.
