Foto: Qeveria e Malit të Zi / Vlada Crne Gore
Qeveria e Malit të Zi, pas marrjes së miratimit nga shumica e anëtarëve të saj, ka vendosur mbi nevojën për evakuim të menjëhershëm të shtetasve malazezë nga Lindja e Mesme.
Në këtë kuadër, Ministria e Punëve të Jashtme ka formuar një shtab krizash i cili ka kontaktuar me Ambasadën e Malit të Zi në Emiratet e Bashkuara Arabe, Ambasadën në Turqi, Konsullatën e Përgjithshme në Stamboll, Zyrën e Malit të Zi në Azerbajxhan, si dhe konsullatat nderi në Jordan dhe Liban. Ministria është në kontakt të vazhdueshëm edhe me partnerë ndërkombëtarë dhe lokalë të rëndësishëm.
Që nga fillimi i krizës, Ministria e Punëve të Jashtme ka lëshuar njoftime publike dhe ka këshilluar qytetarët malazezë për të vepruar me qetësi dhe përgjegjësi, duke vënë sigurinë personale në plan të parë dhe duke ndjekur me përpikëri udhëzimet e autoriteteve lokale, si dhe duke ndjekur rregullisht njoftimet zyrtare të MPJ-së.
Për shkak të ndërprerjeve dhe kufizimeve të përkohshme në trafikun ajror në pjesë të Lindjes së Mesme, udhëtarët këshillohen të mbeten në kontakt me kompanitë ajrore për informacion mbi ndryshimet në oraret e fluturimeve dhe alternativat e mundshme për vazhdimin e udhëtimit.
Duke marrë parasysh përkeqësimin e situatës, Ministria e Punëve të Jashtme ka vlerësuar se është e nevojshme të ndërmerren hapa për evakuimin e menjëhershëm të shtetasve malazezë, me shpenzimet e shtetit të Malit të Zi, siç bëhet zakonisht në situata të tilla.
Shtabi, në bashkëpunim me institucionet relevante dhe përfaqësitë diplomatike dhe konsullore, është gati të ndërmarrë të gjitha masat e nevojshme për organizimin dhe realizimin e evakuimit, përfshirë organizimin e një fluturimi humanitar special nga Egjipti, për evakuimin e shtetasve që ndodheshin në vizitë turistike në Jordan dhe ata që gjendeshin në territorin e Egjiptit, si dhe për të koordinuar përdorimin e avionëve nga flota e kompanisë kombëtare ajrore.
