Dhunë dhe tensione janë regjistruar gjatë një tubimi në Beograd mbrëmjen e 2 nëntorit, në mbështetje të nënës së një prej 16 viktimave të tragjedisë në stacionin hekurudhor të Novi Sadit, ku një vit më parë u shemb një strehë betoni.
Nëna ka nisur grevë urie, duke kërkuar llogaridhënie për vdekjen e djalit të saj. Gjatë protestës, disa mbështetës qeveritarë hodhën mjete piroteknike drejt protestuesve.
Ngjashëm, tubime u mbajtën edhe në Novi Sad dhe qytete të tjera më të vogla.
Protestuesit, kryesisht të rinj, kërkojnë zgjedhje të parakohshme, me shpresën për të rrëzuar qeverinë aktuale populiste.
Tubimi përkujtimor në Novi Sad pasqyroi gjithashtu pakënaqësi të thellë me sundimin autoritar të presidentit Aleksandar Vuçiç, që vazhdon prej 13 vitesh, sipas gazetës The Guardian.
Autoritetet kanë marrë masa të ashpra ndaj protestuesve gjatë muajve të fundit, me qindra të arrestuar dhe shpërndarje të demonstratave.
Mediat dhe zyrtarët pro-qeveritarë i kanë etiketuar studentët protestues si “terroristë” dhe i kanë akuzuar për nxitje të dhunës.
Edhe një vit pas tragjedisë, askush nuk është shpallur fajtor për incidentin në stacionin hekurudhor.
