Foto: Kuvendi i Malit të Zi / Skupština Crne Gore
Deputetët e Parlamentit Evropian (PE) dhe Parlamentit të Malit të Zi miratuan sot një Deklaratë dhe rekomandime të përbashkëta drejtuar Këshillit për Stabilizim dhe Asociim, në të cilën rikonfirmohet rëndësia e politikës së zgjerimit të Bashkimit Evropian në Ballkanin Perëndimor, dhe në veçanti, qëndrimi i vendosur i Malit të Zi në rrugën e tij strategjike drejt BE-së.
Në deklaratë theksohet se çdo vend kandidat duhet të vlerësohet në bazë të meritave të veta, progresit aktual dhe vlerësimeve objektive në përmbushjen e kritereve të anëtarësimit.
“Përshëndetet përparimi i rëndësishëm i Malit të Zi në procesin e anëtarësimit në Bashkimin Evropian në vitin 2024, duke përfshirë mbylljen e përkohshme të tre kapitujve të negociatave në fund të vitit. Gjithashtu u mirëprit angazhimi i vazhdueshëm dhe ambicioz i Malit të Zi për të vazhduar përpjekjet për mbylljen e kapitujve të mbetur të negociatave gjatë viteve 2025 dhe 2026 dhe për të qenë gati për t’u bashkuar me BE-në në vitet e ardhshme, gjatë mandatit aktual të Parlamentit Evropian”, theksohet në deklaratë.
Në deklaratë thuhet se, inkurajohen të gjithë aktorët politikë në Mal të Zi që të qëndrojnë të fokusuar në qëllimin strategjik të integrimit në BE dhe reformat e nevojshme dhe të informojnë qartë të gjithë shoqërinë në Mal të Zi për to.
Këshilli për Stabilizim dhe Asociim i bën thirrje Malit të Zi që të harmonizojë plotësisht kuadrin ligjor elektoral me standardet e BE-së, veçanërisht në drejtim të harmonizimit të legjislacionit zgjedhor, të drejtës për të votuar dhe kandiduar, transparencën, mekanizmat e zgjidhjes së mosmarrëveshjeve dhe monitorimin e financimit të fushatës.
