Foto: Olsi Shehu / AA
Kryeministri i Shqipërisë, Edi Rama ka deklaruar se Shqipëria ka vetëm një zgjedhje dhe plan, që sipas tij është anëtarësimi në Bashkimi Evropian (BE), raporton Anadolu.
Takimi me temë “Shqipëria 2030 në BE – Rruga e Reformave”, organizuar nga Kuvendi i Shqipërisë në Pallatin e Kongreseve në Tiranë ka mbledhur së bashku zyrtarë të lartë dhe përfaqësues nga BE-ja dhe institucione të tjera.
Duke folur për procesin e integrimit evropian të vendit, Rama u shpreh se janë hapur zyrtarisht dy grup-kapituj të negociatave dhe se kanë ambicie të hapin të tjerë në vijim.
Rama shtoi se janë pozicionuar më mirë se asnjëherë në të gjitha renditjet evropiane në fushën e mirëqeverisjes dhe të anti-korrupsionit.
“Ne nuk kemi asnjë zgjedhje tjetër dhe nuk duam asnjë zgjedhje tjetër për hir të së vërtetesës. Ne kemi vetëm një zgjedhje, vetëm një plan, vetëm një rrugë që është Bashkimi Evropian. Për ne është shumë e qartë, ne nuk jemi perëndimorë të përkëdhelur nga fati. Ne e dimë shumë mirë që Bashkimin Evropian është shumë më tepër se sa një bankomat. Ne e dimë shumë mirë që Bashkimi Evropian është vendi i shpëtimit tonë nga historia jonë”, tha Rama.
Rama shtoi se duhet të hyjnë në atë derë (të BE-së) që është hapur sot si mundësi, jo vetëm reale, po aktuale, sipas tij, një derë që është hapur me premisën që deri në fund të vitit 2027, të mund të mbyllin negociatat, si një vullnet i dyanshëm dhe “një derë që mund të mbyllet nëse ne nuk jemi të shpejtë të fokusuar për ta shfrytëzuar hapësirën e kohës që kemi në dispozicion”.
“Mund të mbyllet sepse historia e zgjerimit tregon që ajo derë hapet dhe ajo derë mbyllet. Historia e zgjerimit tregon që fatet e vendeve që duan të hyjnë në atë derë dhe të vendeve që janë pas asaj dere, jo gjithmonë përputhen; interesat jo gjithmonë përputhen dhe prandaj ne jemi shumë të bindur që ky komision, puna e të cilit do të vazhdojë edhe në legjislaturën e ardhshme që të jemi shumë të qartë, është kyç për të mundësuar, jo vetëm hyrjen në atë derë, por edhe qëndrimin aty”, tha Rama.
