Foto: Qeveria e Malit të Zi / Vlada Crne Gore
Marrëveshja me Emiratet e Bashkuara Arabe për bashkëpunim ekonomik është miratuar nga Qeveria dhe do t’i propozohet Kuvendit në formë të ligjit, ndërsa kryeministri Millojko Spajiq ka paralajmëruar se do të bisedojë me të gjithë shefat e grupeve parlamentare para debatit parlamentar.
Qeveria ka pranuar edhe konkluzionet e Kuvendit Komunal të Ulqinit nga 21 marsi për investimin nga Emiratet e Bashkuara Arabe dhe ka shprehur gatishmërinë maksimale për bashkëpunim me komunat.
“Çdo projekt i mundshëm, për shkak se nuk kemi marrë asgjë përfundimtare nga investitori, marrim përsipër të marrim parasysh konkluzionet e Këshillit të Komunës së Ulqinit gjatë planifikimit të çdo projekti, dëshirojmë që komuniteti lokal të jetë maksimalisht i përfshirë. Një shembull të tillë e kemi pasur në Andrijevicë, ku kemi marrë parasysh sugjerimet e tyre dhe kemi ndryshuar trasenë e autostradës. Të gjithë qytetarët në Malin tonë të Zi do t’i trajtojmë njësoj, pavarësisht për të cilën komunë bëhet fjalë”, tha kryeministri.
Zëvendëskryeministri për Politikë Ekonomike, Nik Gjeloshaj, tha se kanë folur shumë për investimet e paralajmëruara nga Emiratet e Bashkuara Arabe.
Ai përshëndeti vendimin për pranimin e konkluzioneve të Kuvendit Komunal të Ulqinit.
“Qëndrimi për pranimin e konkluzioneve të Këshillit të Komunës së Ulqinit është diçka që do ta udhëzojë Qeverinë edhe në raport me komunat tjera. Qeveria e Malit të Zi me këtë marrëveshje, gjegjësisht nëse ka marrëveshje me investitorin, nuk do të punojë jashtë marrëveshjes me Komunën e Ulqinit. Jam shumë i kënaqur me realizimin e pranimit të konkluzioneve të Kuvendit të Ulqinit nga Qeveria, për të cilat votoi edhe Forumi Shqiptar,“ tha Gjeloshaj.
Ai më tej shtoi se Forumi Shqiptar në Qeveri është për të mbrojtur interesat e popullit shqiptar dhe vetëm në këtë mënyrë, unik dhe të vendosur, do të vazhdojnë edhe në të ardhmen.
