Foto: AA
Ministrja e Punëve të Jashtme e Sllovenisë, Tanja Fajon, para takimit të ministrave të Jashtëm të NATO-s në Bruksel ka bërë të ditur se ajo do të informojë aleatët e NATO-s për situatën në Ballkanin Perëndimor, transmeton Anadolu.
Fajon gazetarëve të mbledhur para takimit në Bruksel u tha se në takim me aleatët do të diskutohet edhe situata në Ballkanin Perëndimor, duke theksuar se Sllovenia po i monitoron nga afër zhvillimet në rajon.
“Unë gjithashtu do të fokusohem në Ballkanin Perëndimor, i cili është një fqinj i drejtpërdrejtë i yni. Ne po ndjekim zhvillimet në Serbi, Bosnjë e Hercegovinë, zgjedhjet në Kosovë dhe ne duhet të angazhohemi në këtë pjesë të rajonit”, tha Fajon.
Shefja e diplomacisë sllovene po ashtu tha se vendi i saj ofron mbështetje për BeH-në dhe dëshiron që “ajo të mbetet në rrugën evropiane, të mbetet një vend pa tensione, sepse jetojmë në një kohë kur duhet të shohim lidership të fortë të përkushtuar për sigurinë dhe mirëqenien e qytetarëve”.
Në takimin e sotëm në Bruksel, siç tha më herët sekretari i përgjithshëm i NATO-s, Mark Rutte, Ballkani Perëndimor nuk është temë specifike, por mund të ngrihet si çështje nga aleatët.
Sa i përket Ukrainës, Fajon tha se vendi i saj mbështet një armëpushim të përhershëm dhe një paqe të qëndrueshme për popullin ukrainas.
Përveç ministrave të Jashtëm të vendeve anëtare të NATO-s, në takim do të marrin pjesë edhe ministri ukrainas i Punëve të Jashtme, Andrii Sybiha, përfaqësuesja e lartë e BE-së për Çështjet e Jashtme dhe Politikën e Sigurisë, Kaja Kallas si dhe përfaqësues të vendeve partnere nga rajoni Indo-Paqësor, përkatësisht Australia, Japonia, Zelanda e Re dhe Koreja e Jugut.
