Foto: predsjednik.me
Presidenti i Malit të Zi, Jakov Millatoviq, gjatë pjesëmarrjes në Samitin e Komunitetit Politik Evropian në Kopenhagë, u bëri thirrje të gjithë aktorëve politikë në vend që të tregojnë më shumë seriozitet dhe përgjegjësi në procesin e integrimit në Bashkimin Evropian.
Ai theksoi se Mali i Zi është vendi kandidat më i avancuar për anëtarësim, me synimin për t’u bërë shteti i 28-të anëtar i BE-së deri në vitin 2028, dhe kërkoi që BE të fillojë hartimin e Marrëveshjes së Anëtarësimit me Malin e Zi.
Sipas tij, kjo do të ishte një sinjal i fortë për të gjithë vendet kandidate.
Millatoviq tha se “topi është tani në fushën e Malit të Zi”, dhe se BE-ja pret përshpejtim të reformave, sidomos në drejtësi dhe funksionalitet institucional.
Ai kritikoi mungesën e vullnetit politik për të zgjidhur çështje kyçe, siç është mosfunksionimi i Gjykatës Kushtetuese, dhe sjelljet në Kuvend, ku propozimet e tij nuk janë shqyrtuar fare.
Presidenti dënoi deklaratat nga partitë në pushtet që lidhnin zgjedhjen e gjyqtarëve të Gjykatës Kushtetuese me vizitën e presidentes së Komisionit Evropian, Ursula von der Leyen, duke i cilësuar ato si “të papërgjegjshme”.
Ai përfundoi duke theksuar se procesi i integrimit evropian duhet të jetë një angazhim i përditshëm i të gjithë aktorëve politikë, jo vetëm i presidentit apo qeverisë, dhe se qytetarët duhet të gjykojnë vetë se kush po e kryen përgjegjësinë shtetërore siç duhet.
