Foto: Qeveria e Malit të Zi / Vlada Crne Gore
Nënkryetari i Qeverisë së Malit të Zi për Punët e Jashtme dhe Evropiane, Filip Ivanoviq, theksoi se siguria kibernetike nuk është vetëm çështje teknike, por edhe e sovranitetit, sigurisë dhe qëndrueshmërisë demokratike.
Ai hapi në Podgoricë konferencën rajonale WB CyberPulse 2025, e cila ka për qëllim forcimin e rezistencës kibernetike në Ballkanin Perëndimor përmes bashkëpunimit dhe harmonizimit me standardet evropiane.
Konferenca organizohet nga Këshilli Rajonal për Bashkëpunim dhe Komisioni Evropian, me pjesëmarrjen e ministrave, ekspertëve nga institucionet e BE-së, organizatave ndërkombëtare dhe sektorit privat.
Ivanoviq nënvizoi rëndësinë e bashkëpunimit rajonal, duke theksuar se asnjë vend nuk mund t’i përballojë vetëm këto sfida, dhe përmendi rolin kyç të Qendrës Rajonale për Kapacitetet Kibernetike, e vendosur në Mal të Zi.
Temat kryesore të diskutimit ishin roli i inteligjencës artificiale në sigurinë kibernetike, përfshirja e grave dhe të rinjve, si dhe rëndësia e komunitetit akademik në ndërtimin e kapaciteteve. Ivanoviq përfundoi fjalën e tij duke thënë se siguria kibernetike është një aftësi e re që duhet ndërtuar së bashku nga qeveritë, shkollat, mediat dhe qytetarët, dhe Mali i Zi është i gatshëm të jetë partner dhe mikpritës në këtë proces.
