Foto: Qeveria e Malit të Zi / Vlada Crne Gore
Guvernerja e Bankës Qendrore të Malit të Zi, Irena Radoviq, theksoi se sistemi bankar i vendit është i qëndrueshëm, i likuiduar dhe i kapitalizuar mirë, duke kontribuar në rritjen ekonomike dhe zhvillimin e qëndrueshëm.
Në vitin 2024, sistemi bankar shënoi rritje të depozitave, kredive dhe kapitalit, ndërsa kredia e keqe ra në nivelin më të ulët të 15 viteve të fundit.
Aktivat e bankave janë afërsisht të barabarta me PBB-në e vendit.
Në vitin 2024, Mali i Zi u bashkua me Zonën e Vetme të Pagesave në Euro (SEPA), duke e afruar më shumë me Bashkimin Evropian dhe duke mundësuar transaksione më të sigurta dhe më të lira.
Në bashkëpunim me Bankën Evropiane për Rindërtim dhe Zhvillim (BERZH), Banka Qendrore po implementon iniciativën “We Finance Code” për të rritur aksesin në financim për gratë sipërmarrëse dhe po zhvillon programin “Women on Boards Montenegro” për të rritur përfaqësimin e grave në pozita udhëheqëse.
Në periudhën e ardhshme, fokusi i Bankës Qendrore do të jetë forcimi i sistemit financiar, modernizimi i tij dhe integrimi në kornizën evropiane, duke zbatuar standardet më të larta në fushën e financave.
