Foto: Qeveria e Malit të Zi / Vlada Crne Gore
Mali i Zi në Tregun Unik të Bashkimit Evropian (BE) sheh një mundësi për një epokë të re të zhvillimit të tij ekonomik, bëri të ditur kryenegociatori, Predrag Zenoviq.
Në takimin e Nënkomitetit për Tregun e Brendshëm dhe Konkurrencën ndërmjet Malit të Zi dhe Komisionit Evropian (KE), i cili u mbajt të martën në Podgoricë, ai tha se tregu unik i BE-së nuk është vetëm një koncept ekonomik, por edhe një projekt politik, i cili synon t’i bashkojë kombet evropiane përmes standardeve, rregullave dhe vlerave të përbashkëta.
Zenoviq theksoi se ky është një nga projektet më ambicioze dhe më të rëndësishme të integrimit evropian dhe vlerësoi se Mali i Zi në të sheh një mundësi për një epokë të re të zhvillimit të tij ekonomik.
“Konkurrenca, nga ana tjetër, siguron që kjo hapësirë të mbetet dinamike, inovative dhe e qëndrueshme, pa monopole, me rregulla të barabarta për të gjithë. Së bashku, këto dy ide, ose dy parime, janë parakusht për çdo përparim dhe mirëqenie shoqërore dhe personale”, tha Zenoviq.
Zenoviq bëri të ditur se Mali i Zi ka vazhduar me procese të forta reformuese në kuadër të negociatave me BE-në, duke arritur progres të rëndësishëm në harmonizimin e legjislacionit me çështjet ligjore në fushat kyçe.
