Foto: AP
Presidenti ukrainas Volodymyr Zelensky, ka njoftuar se udhëheqësit ushtarakë perëndimorë, po diskutojnë për dislokimin e mundshëm të trupave në Ukrainë, të cilat do të monitoronin një armëpushim të mundshëm në konfliktin me Rusinë, dhe do të ishin pjesë e strukturës së re të sigurisë në vend.
“Kjo është pika jonë fillestare: ushtria ukrainase duhet të jetë mjaftueshëm e fortë, dhe mbi këtë bazë duhet të ndërtohet e tërë arkitektura e sigurisë”, tha Zelensky.
Franca dhe Britania e Madhe kanë shprehur gatishmërinë për të dërguar trupa, por, Rusia ka kundërshtuar ashpër çfarëdo dislokimi të trupave të huaja në Ukrainë.
Zelensky tha se Ukraina ka ndarë me partnerët e saj amerikanë “të gjitha informatat e nevojshme në lidhje me shkeljet e Rusisë në sektorin e energjisë”.
Zelensky iu referua një marrëveshjeje ndërmjet Ukrainës dhe Rusisë për të mos i sulmuar objektet energjetike të njëra-tjetrës.
Marrëveshja u njoftua nga Shtëpia e Bardhë, më 25 mars, bashkë me një armëpushim për lejimin e lundrimit në Detin e Zi.
