Në organizim të përbashkët të Këshillit Kombëtar të Shqiptarëve dhe Këshillit Kombëtar të Boshnjakëve në Malin e Zi, sot u shënua 80-vjetori i ngjarjes tragjike të Masakrës së Tivarit, ku mijëra qytetarë shqiptar të Kosovës dhe një numër i caktuar me kombësi boshnjake, janë vrarë në fillim të prillit të vitit 1945 në Tivar.
„Pasi që këtë vit mbushen plot 80 vite nga kjo ngjarje tragjike, e kemi konsideruar si obligim moral dhe përgjegjësi kombëtare që në mënyrë dinjitoze të shënojmë këtë përvjetor dhe të nderojmë të rinjët e pafajshëm që humbën jetën në atë masakër dhe në këtë mënyrë të ndërpresim heshtjen që ka mbizotëruar për dekada,“ thuhet në kumtesë të KKSH.
Kjo ngjarje u shënua duke vendosur kurora me lule te vendi i ngjarës dhe duke mbajtur një minut heshtje në nderim të viktimave të pafajshme, pastaj me një fjalë rastit për ngjarjen, të pranishmëve dhe përfaqësuesve të medias i është drejtuar kryetari i Këshillit Kombëtar të Shqiptarëve Faik Nika dhe kryetari i Këshillit Kombëtar të Boshnjakëve Sulo Mustafiq.
Po ashtu në këtë aktivitet morën pjesë edhe Ambasadorja e Republikës së Kosovës në Mal të Zi, SH.S.Znj. Ariana Zherka Hoxha, kryetari i Komunës së Ulqinit z. Genci Nimanbegu, deputeti në Parlamentin e Malit të Zi z. Ilir Çapuni, disa nga pasardhësit e familjeve të viktimave, disa nga anëtarët e Këshillit Kombëtar të Shqiptarëve dhe Këshillit Kombëtar të Boshnjakëve, si dhe disa qytetarë nga Komuna e Tivarit.
„Vlen të përmendim se Këshilli Kombëtar i Shqiptarëve në Mal të Zi, në vitin 2013 ka organizuar konferencë shkencore lidhur me këtë ngjarje dhe ka vendosur për herë të parë kurora me lule te vendi i ngjarjes duke vazhduar edhe në vitet pasuese duke e kujtuar dhe shënuar këtë ngjarje tragjike për popullin shqiptar, të bindur se ngjarje të tilla nuk duhen të harrohen dhe duke shpresuar që tragjedi të tilla të mos përsëritën më kurrë në të ardhmën,“ u theksua në kumtesë të KKSH-së.
