Foto: Portalb
Zyrtarët amerikanë kanë kërkuar nga aleatët e tyre europianë që të vazhdojnë të blejnë armë të prodhuara në SHBA, sipas burimeve të raportuara nga Reuters.
Kjo kërkesë vjen pas propozimit të Komisionit Europian në mes të marsit për të rritur shpenzimet ushtarake dhe për të bashkuar burimet për projekte të përbashkëta mbrojtjeje.
Disa nga këto propozime mund të kufizojnë pjesëmarrjen e kompanive jo-europiane, përfshirë ato amerikane dhe britanike.
Më 25 mars, sekretari amerikan i shtetit, Marco Rubio, u shpreh para ministrave të jashtëm të Lituanisë, Letonisë dhe Estonisë se SHBA dëshiron të vazhdojë të ketë akses në prokurimet e mbrojtjes të vendeve të BE-së.
Sipas mediave të huaja një diplomat i Europës Veriore gjithashtu tha se ata ishin informuar nga zyrtarët amerikanë se çdo pengesë për pjesëmarrjen e kompanive amerikane në prokurimet e armëve të BE-së do të ishte e papranueshme.
Rubio ka planifikuar të diskutojë këtë çështje gjatë vizitës së tij në Bruksel këtë javë, sipas një zyrtari të Departamentit të Shtetit.
Më parë edhe presidenti amerikan Donald Trump ka inkurajuar aleatët europianë të shpenzojnë më shumë për mbrojtjen dhe të marrin më shumë përgjegjësi për sigurinë e tyre.
