Foto: Qeveria e Malit të Zi / Vlada Crne Gore
Zëvendëskryeministri për Politikë Ekonomike dhe njëherësh ministër i Zhvillimit Ekonomik Nik Gjeloshaj u takua me Presidentin e Zyrës Evropiane të Patentave, Antonio Kampinos, i cili ndodhet në vizitën e tij të parë zyrtare në Mal të Zi që nga anëtarësimi i tij në Organizatën Evropiane të Patentave më 1 tetor 2022.
„Rritja e ndërgjegjësimit për rëndësinë e mbrojtjes së patentave është çelësi për inkurajimin e inovacionit dhe përparimin e ekonomisë sonë. I jemi mirënjohës Organizatës Evropiane të Patentave për mbështetjen e vazhdueshme dhe jemi të kënaqur me përfitimet që do të sjellë marrëveshja e re për novatorët,“ theksoi Gjeloshaj në takim.
Ministri mbështeti idenë e krijimit të një qendre informacioni për patentat (patlib) në Mal të Zi dhe shprehu angazhimin e tij për përmirësimin e mëtejshëm të sistemit të mbrojtjes së patentave.
Kryetari Kampinos vlerësoi Malin e Zi për integrimin e tij të përsosur në Organizatën Evropiane të Patentave dhe përparimin drejt anëtarësimit në BE, veçanërisht mbylljen me sukses të kapitullit të pronësisë intelektuale në negociata.
Ai theksoi gjithashtu hapin e rëndësishëm të Malit të Zi drejt ratifikimit të Marrëveshjes së Londrës dhe finalizimit të Marrëveshjes për Bashkëpunim në Kërkim me Organizatën Evropiane të Patentave.
Gjatë takimit u nënshkrua Marrëveshja Bilaterale për Bashkëpunim për vitet e ardhshme, deri në vitin 2028, e cila synon forcimin e sistemit malazez të patentave.
Fushat kryesore të bashkëpunimit përfshijnë mbështetjen në zhvillimin e mjeteve dhe infrastrukturës dixhitale, si dhe shkëmbimin e ekspertizës në procedurat e kërkimit të patentave.
Gjithashtu, prioritet mbetet zhvillimi i sektorit të IT-së dhe bashkëpunimi në fushën e sigurisë së informacionit.
