Foto: Reuters
Bashkimi Europian po pajtohet gradualisht me dështimin e procesit të dialogut për normalizimin e marrëdhënieve mes Kosovës dhe Serbisë dhe është duke shqyrtuar instrumente të tjera për të arritur këtë qëllim.
Deklarata u bë nga shefja e politikës së jashtme të BE-së, Kaja Kallas gjatë një interviste për Radio Evropa e Lirë.
Kallas tha se do të diskutojë me të dërguarin e Posaçëm të BE-së për dialogun, Peter Sorensen në ditët në vazhdim dhe në përfundim do të shqyrtojë instrumentet e tjera për normalizimin.
“Ajo që na intereson është normalizimi i marrëdhënieve mes Kosovës dhe Serbisë. Qoftë përmes këtij dialogu, apo ndonjë instrumenti tjetër, ne do të mbledhim ide dhe do të dalim me një propozim”, deklaroi kryediplomatja e BE.
Kallas nuk dha më shumë detaje çfarë nënkuptonte me instrumente të tjera dhe as nëse ato do të jenë shtrënguese për Kosovën e Serbinë për t’i detyruar të dialogojnë apo jo.
Ajo komentoi edhe protestat në Serbi, duke i cilësuar pakënaqësitë ndaj Vuçiç si shenja që demokracia serbe funksionon.
Deklaratat u bënë në prag të vizitave që Kallas planifikon të zhvillojë në Ballkan javën e ardhshme.
