Foto: Malësia/Facebook/
Sot, Komuna e Tuzit shënon 7-vjetorin e themelimit të saj si njësi e veçantë administrative.
Më 1 shtator të vitit 2018, Malësia riktheu dinjitetin dhe zërin e saj institucional, duke u bërë komunë më vete, një moment historik për banorët e kësaj treve.
Me këtë rast, kryetari i Komunës së Tuzit, Lindon Gjelaj, ka dërguar një mesazh urimi për të gjithë qytetarët e Malësisë, duke e cilësuar këtë datë si një fitore të përbashkët, rezultat i sakrificave dhe përpjekjeve të shumë brezave.
“Për mua, të jem në krye të Komunës së Tuzit është nderi më i madh i jetës sime,” thekson Gjelaj, duke falënderuar punonjësit e administratës për përkushtimin, diasporën për mbështetjen e vazhdueshme, si dhe të gjithë qytetarët për besimin dhe bashkëpunimin.
Kryetari Gjelaj vlerësoi gjithashtu rolin e unitetit të partive shqiptare nën ombrellën e Forumit Shqiptar, si një faktor kyç për arritjet e deritanishme dhe për rrugën përpara.
“Bashkimi ynë është forca jonë,” u shpreh ai.
“Vetëm të bashkuar do të ecim drejt një Malësie më të zhvilluar dhe më krenare.”
Në fund të mesazhit të tij, kryetari i Komunës së Tuzit, Lindon Gjelaj, uron të gjithë qytetarët: Gëzuar Ditën e Komunës!
