Në Mal të Zi, kushedi pas sa vite deficit, në gjysmën e parë të këtij viti është arritur suficit në buxhetin e shtetit, ka bërë të ditur kryeministri Dritan Abazoviq.
Në një prononcim në profilin e tij në Facebook, ai ka thënë se dëshiron të ndajë me qytetarët dy të dhëna statistikore jashtëzakonisht të rëndësishme sa i përket ekonomisë malazeze.
“E para është se paga mesatare prej 795 euro është regjistruar në qershor, më e larta që nga metrika që është kryer në Mal të Zi dhe më e larta në rajon”, tha Abazoviq.
Ai po ashtu ka deklaruar se Mali i Zi në dhjetë vitet e fundit nuk ka pasur suficit në buxhetin e shtetit dhe se në gjashtë muajt e parë të këtij viti është realizuar suficit prej 179 milionë euro.
“Këto janë rezultate të lëvizjeve vendimtare politike, luftës kundër korrupsionit dhe krimit, qëndrimit patriotik ndaj aseteve shtetërore”, përfundoi Abazoviq.
