Kryeministri ukrainas, Denys Shmyhal tha se presidentja e Komisionit Evropian Ursula von der Leyen riafirmoi mbështetjen e plotë të BE-së për stabilitetin financiar të Ukrainës dhe aspiratat e vendit për anëtarësim në Union gjatë një takimi dypalësh në Spanjë, transmeton Anadolu.
Të dy udhëheqësit u takuan në margjinat e Konferencës së OKB-së për Financimin e Zhvillimit, ku Shmyhal kërkoi angazhime të besueshme financimi për vitet 2026 dhe 2027 për të ndihmuar rimëkëmbjen ekonomike të Ukrainës mes luftës së vazhdueshme me Rusinë.
“Falënderova Komisionin Evropian dhe presidenten Von der Leyen për mbështetjen e tyre kyçe, veçanërisht në sektorin e mbrojtjes”, shkroi Shmyhal në Telegram pas takimit.
Ai tha se diskutuan mbi qëllimet e pranimit të Ukrainës në BE, duke theksuar shpresën e Kievit për të nisur bisedimet zyrtare të anëtarësimit më vonë këtë vit. “BE-ja konfirmoi mbështetjen e saj të plotë për hapat tanë të ardhshëm”, tha Shmyhal.
