Foto: CDM
Situata aktuale në tregun e derivateve të naftës në Mal të Zi është e qëndrueshme dhe furnizimi është i mjaftueshëm, sipas konkludimeve të Këshillit për sigurimin e furnizimit të sigurt të tregut me derivate nafte, ku nuk ka shenja për çrregullime në furnizim. Kjo u bë e ditur nga Ministria e Energjisë dhe Minierave.
Ministri Admir Shahmanoviq theksoi nevojën për koordinim të vazhdueshëm ndërmjet institucioneve për të garantuar stabilitetin e tregut dhe sigurinë e furnizimit, duke marrë parasysh lëvizjet e paparashikueshme globale në çmimet e energjisë.
Në takim u diskutua ndikimi i tregjeve ndërkombëtare, rreziqet për ekonominë dhe qytetarët, si dhe ndryshimet e vazhdueshme të çmimeve të karburanteve.
U theksua rëndësia e mbledhjes së informacionit nga importuesit dhe distributorët kryesorë.
Ministria ka propozuar masa si ulja e akcizave për të ndikuar në uljen e çmimeve dhe shkurtimi i periudhës së përllogaritjes së çmimeve për të krijuar kushte më të favorshme për bizneset. Këto masa, sipas ministrisë, kanë dhënë rezultate.
Gjithashtu u diskutua mundësia e masave mbështetëse, përfshirë subvencione për bujqit, transportuesit dhe kategoritë më të ndjeshme të popullsisë, si dhe sfida në zonat kufitare ku vërehet rritje e konsumit për shkak të dallimeve në çmime me vendet fqinje.
Ministri i Bujqësisë, Vladimir Jokoviq, theksoi rëndësinë e mbështetjes për bujqit, veçanërisht gjatë periudhës së mbjelljeve, duke shtuar se masat e ardhshme do të varen nga bashkëpunimi me Ministrinë e Financave dhe mundësitë buxhetore.
