Foto: predsjednik.me
Presidenti i Malit të Zi, Jakov Millatoviq, gjatë vizitës në Shkup theksoi se procesi i anëtarësimit në Bashkimin Evropian duhet të shfrytëzohet si mjet kyç për reforma dhe forcimin e institucioneve demokratike. Ai nënvizoi se Mali i Zi ka hapur të gjithë kapitujt e negociatave dhe ka mbyllur përkohësisht disa prej tyre, duke bërë përparim të rëndësishëm drejt standardeve evropiane. Sipas tij, ky proces ka edhe rëndësi rajonale dhe gjeopolitike, jo vetëm kombëtare.
Millatoviq paraqiti katër skenarë të mundshëm për vendet kandidate:
- Dështimi për reforma, që sjell humbje për vendin dhe BE-në ;
- Reforma pa anëtarësim, që mund të çojë në regres demokratik (si rasti i Maqedonia e Veriut);
- Anëtarësim për arsye gjeopolitike pa reforma të mjaftueshme, që nuk është i qëndrueshëm;
- Skenari ideal: reforma reale dhe anëtarësim i merituar, që sjell stabilitet dhe zhvillim.
Ai theksoi se ky i fundit është qëllimi për Malin e Zi, i cili synon të bëhet anëtari i 28-të i BE-së deri në vitin 2028. Presidentja e Maqedonisë së Veriut, Gordana Siljanovska-Davkova, deklaroi se integrimi në BE është një zgjedhje natyrore dhe strategjike për rajonin, duke shtuar se zgjerimi është i nevojshëm për forcimin e Evropës në një kontekst të ndërlikuar gjeopolitik. Ajo theksoi se përparimi i Malit të Zi do të ishte sinjal i rëndësishëm se zgjerimi i BE-së është real dhe i arritshëm.
