Foto: Ora News
Përfaqësuesja e Ministrisë së Arsimit, Shkencës dhe Inovacionit, Jasna Jovanoviq, drejtoreshë e përgjithshme e Drejtorisë për mësim gjatë gjithë jetës, tha se tek të rinjtë është i nevojshëm edukimi dhe masat parandaluese në ndalimin e abuzimit me alkoolin.
Ajo mori pjesë në takimin profesional dhe edukativ “Pasojat shëndetësore dhe sociale të alkoolit tek të rinjtë: njohuri profesionale dhe masa parandaluese”, i cili u organizua nga Instituti i Shëndetit Publik të Malit të Zi në bashkëpunim me OJQ-në Cazas, me rastin e 1 Prillit – Ditës Ndërkombëtare kundër Alkoolizmit.
Ajo theksoi rëndësinë e edukimit dhe masave parandaluese për të frenuar abuzimin me alkoolin tek të rinjtë. Jovanoviq theksoi se Ministria është duke punuar në mënyrë aktive në zhvillimin e iniciativave arsimore dhe zbatimin e programeve që promovojnë stile të shëndetshme të jetesës, si dhe në forcimin e bashkëpunimit me institucionet dhe organizatat profesionale.
Në takim u diskutua për efektet negative të alkoolit në shëndet dhe shoqëri, si dhe masat që duhen marrë për të reduktuar disponueshmërinë dhe efektet e dëmshme të tij, veçanërisht tek të rinjtë.
Po ashtu, u theksua veçanërisht roli i sistemit arsimor në ndërgjegjësimin dhe informimin në kohë të të rinjve, si dhe mbështetjen për të bërë zgjedhje të shëndetshme.
Ministria e Arsimit, Shkencës dhe Inovacionit do të vazhdojë të mbështesë iniciativat që kontribuojnë në shëndetin dhe mirëqenien e të rinjve, sepse investimi në to do të thotë investim në një të ardhme më të sigurt dhe më të begatë për shoqërinë.
