Foto: Kuvendi i Malit të Zi / Skupština Crne Gore
Kreu i klubit parlamentar të Forumit Shqiptar, Artan Cobi, bëri të ditur se Forumi nuk ka marrë ende një vendim përfundimtar në lidhje me Marrëveshjen mes Malit të Zi dhe Emirateve të Bashkuara Arabe.
“Për shkak të interesimit mediatik dhe interpretimeve të ndryshme, në lidhje me vendimin e Forumit Shqiptar në lidhje me Marrëveshjen mes Malit të Zi dhe Emirateve të Bashkuara Arabe, për të cilën Kuvendi duhet të deklarohet në periudhën në vijim, informoj opinionin se Forumi Shqiptar nuk ka marrë ende një vendim përfundimtar lidhur me këtë temë”, theksoi Çobi.
Çobi tha se këtë temë do ta trajtojnë me seriozitet pasi, siç tha ai, ashtu janë trajtuar gjithmonë tema që i përkasin të gjithë shoqërisë dhe shtetit.
“Ne do ta diskutojmë këtë në organet më të larta të Forumit Shqiptar dhe si gjithmonë do ta informojmë opinionin menjëherë, hapur, saktë dhe qartë për qëndrimet e marra. Ne e kemi theksuar vazhdimisht se nuk jemi kundër investimeve. Përkundrazi. Por ne gjithashtu besojmë se ato duhet të jenë në radhë të parë në përputhje me interesin publik dhe duhet të nënkuptojnë përfshirje të drejtpërdrejtë të komuniteteve lokale dhe procesin e vendimmarrjes që do të ndikojë më shumë në to. Ky është standard europian, është korrekt dhe i drejtë”, theksoi Çobi.
Në seancën e Qeverisë ku u diskutua për këtë temë, ministrat e mbështetën marrëveshjen, e cila, siç tha deputeti Çobi, dërgoi mesazh se „dëshirojmë investime dhe bashkëpunim me Emiratet dhe presim që të pranohen konkluzionet e komunës së Ulqinit.“
“Jemi të bindur se konkluzionet e komunës së Ulqinit do të pranohen dhe presim që deri në votim në Kuvendin e Malit të Zi të kemi një qëndrim të zyrtarizuar të Qeverisë së Malit të Zi dhe Komunës së Ulqinit. Sigurisht, që edhe për një opsion të kundërt nga ky, do të kemi qëndrim,“ theksoi Çobi.
