Foto: Kuvendi i Malit të Zi / Skupština Crne Gore
Nënkryetari i Kuvendit të Malit të Zi, Nikollë Camaj, beson se Marrëveshja me Emiratet e Bashkuara Arabe, të cilën Qeveria e Malit të Zi e ka përcjellë në Kuvend, do të marrë mbështetjen e shumicës parlamentare.
Pasi marrëveshja me Emiratet e Bashkuara Arabe për investime rreth 30 miliardë euro mori mbështetjen e Qeverisë, pritet votimi në Kuvend.
Nëse marrëveshja ndërkombëtare e nënshkruar nga kryeministri Spajiq do të ketë mbështetjen e deputetëve është një pyetje që po ngjallë polemik në opinion.
Nënkryetari i Kuvendit Camaj beson se pas një diskutimi cilësor marrëveshja do të marrë dritën jeshile.
Ai thekson se në Mal të Zi nevojiten investime cilësore, si dhe se beson se janë ndjekur të gjitha procedurat me ruajtjen e detyrueshme të mjedisit.
“Mendoj se kjo është marrë parasysh me nënshkrimin e marrëveshjes dhe sigurisht që Ligji për Marrëveshjen do të miratohet në Kuvend. Mendoj se gjithmonë mund të gjenden mekanizma për të mbrojtur ende atë që duhet mbrojtur dhe t’ju thëm të drejtën, duke korrigjuar padrejtësinë, sidomos ndaj Ulqinit, ku brezi i pronës detare është shumë më i gjerë se normalja apo ajo që është në pjesët tjera të Malit të Zi”, tha Camaj.
Prandaj, siç thotë nënkryetari Camaj, marrëveshja do të ketë mbështetjen e Forumit Shqiptar.
“Unë mund të flas për qëndrimin e shprehur tashmë në Qeveri, ku ministrat e Forumit Shqiptar e votuan atë marrëveshje, dhe nuk shoh arsye për ta ndryshuar atë mendim duke pasur parasysh se marrëveshja do të trajtohet në Kuvend, do të miratohet në Kuvend dhe do të zhduken të gjitha pikëpyetjet dhe enigmat e mundshme”, theksoi Camaj.
