Të kaluarën nuk mund ta ndryshojmë, por me bashkëpunim të mirë rajonal mund të krijojmë një të ardhme më të mirë dhe më të begatë për qytetarët e Ballkanit Perëndimor, theksoi kryeministri në mandat teknik Dritan Abazoviq gjatë Forumit të Dytë Ekonomik që mbahet në Shkup.
Duke folur për rëndësinë e bashkëpunimit dhe pajtimit në Ballkanin Perëndimor, Abazoviq theksoi se kjo kërkon lëvizshmëri më të madhe të qytetarëve, ndërveprim dhe komunikim të ndërsjellë.
“Krijimi i një tregu të përbashkët rajonal inkurajon zhvillimin ekonomik dhe rritjen e standardit të jetesës së qytetarëve të vendeve tona, me zbatimin e normave dhe standardeve evropiane”, theksoi kryeministri i Malit të Zi.
Duke diskutuar për iniciativat rajonale, Abazoviq deklaroi se të gjitha nismat rajonale, pavarësisht nga emri i tyre, “synojnë ta afrojnë Malin e Zi drejt anëtarësimit në Bashkimin Evropian dhe në asnjë mënyrë të mos jenë zëvendësues për anëtarësimin e plotë në familjen evropiane të kombeve”.
Qeveria thekson se Forumi Ekonomik i mbajtur në Shkup mbledh figurat më të shquara ndërkombëtare dhe vendore nga bota e politikës, biznesit, shkencës, diplomacisë, të cilët do të flasin në temën e sfidave aktuale në Maqedoninë e Veriut, rajonin e Ballkanit Perëndimor dhe më gjerë.
